:نظـــريـــة الأرض المسطحــــــــة" بيــن العلــم والـــديــــن والإلحــــــاد"

:نظـــريـــة الأرض المسطحــــــــة" بيــن العلــم والـــديــــن والإلحــــــاد"

كاين لي كيقول بلي الأرض كروية وكاين لي كيقول بلي الأرض مسطحة، كاين لي كيناقش بالدين ويكذب العلم وكاين لي كيناقش بالعلم ويكذب الدين..كل واحد وشنو كيقول..موهيم نمشيو للموضوع...

أولا خصكم تعرفو بلي هاد الفكرة ديال الأرض المسطحة قديمة بزااف ماشي يالاه بانت، "نظرية الأرض المسطحة" كترجع للكاتب "صامويل شينتون" هاد السيد باش يتعمق مزيان فهاد النظرية ناض أسس واحد الجمعية بإسم "جمعية الأرض المسطحة" من بعدما مات صامويل غايجي عشيرو "تشارلز كينيث جونسون" وغايترأس الجمعية، هاد الجمعية كينضمو ليها غير لي مأيدين الفكرة ديال الارض المسطحة وف 2001 وصل العدد ديال الأعضاء ل100 ألف عضو يعني 100 الف واحد مأيد الفكرة ديال الارض المسطحة، هاد النظرية كتقول بلي الارض دايرة بحال شي قرص دائري (بحال درهم) فالقطب الشمالي اما فالقطب الجنوبي كاين واحد السور جليدي عالي بزااف ضاير على الأرض الطول ديالو كثر من 150 قدم وهاد السور كتمولو "نازا" باش تاواحد مايقرب ليه وباش حتى واحد ميعرف شنو كاين، وكتقول النظرية بلي كاينة واحد القبة سماوية ضايرة على الشمس والقمر والأكسجين باش تحميهم من برا وكتقول بلي الشمس والقمر كايدورو فواحد العلو قدروه ب3000 ميل يعني ماشي الارض لي كادور...

النظرية كاتقول بلي مكايناش شي حاجة سميتها الجاذبية وبلي "نازا" كيكدبو على بنادم حيت ميمكنش لينا نغادرو الغلاف الجوي باش نصورو الارض من برا وبلي الحكومات متافقين مع "نازا" وكيمولوها باش يكدبو على بنادم....نشوفو دابا هاد النظرية كيفاش كتشوف الظواهر الفلكية، بالنسبة ل"تعاقب الليل والنهار" حنا كنعرفو بلي تعاقب الليل والنهار كيوقع بسباب دوران الارض ولكن نظرية الارض المسطحة كتقول بلي الشمس كادور فواحد المسار دائري فوق الارض وحيت حجم الشمس اصغر من الارض هادشي كيخليها تضوي الأرض 24 ساعة على 24....اما بالنسبة للفصول الأربعة حنا كنعرفو بلي الفصول كاتغير بفعل دوران الارض على الشمس والدورة كاتكمل على 365 يوم وفهاد المدة كنعيشو كاع الفصول، ولكن فنظرية الارض المسطحة الشمس كادور فعدة مدارات وفكل مدار كاين فصل...

بالنسبة لخسوف القمر حنا كنعرفو بلي الخسوف كيوقع فاش كيكون القمر فالظل ديال الارض وفهاد الحالة كتكون الارض بين الشمس والقمر، اما نظرية الارض المسطحة كتقول بلي كاين واحد القمر مضاد كايحجب الضو ديال القمر ف فترة الخسوف..

نرجعو شوية لور فالقرن 18 جا عالم الفلك "غاليلي" عند الكنيسة وقاليهم بلي الارض كروية والارض هي لي كادور على الشمس هنا رجال الكنيسة غيتاهموه بالاعتداء على المقدسات المسيحية وحكمو عليه محاكم التفتيش باش يحرقوه ولا يضربوه بالمؤبد ولكن من بعد وقفو الحكم...كاينة بعض الأمثلة كتعرف بيها واش الارض كروية ولا مسطحة، مثلا كتكون فالبحر وكتبقى حاضي شي باطو حتى كيغبر ونت كتقول راه بعيد داكشي علاش مكيبانش ولكن لا ايلا طلعتي تشوف من شي جبل غيبان لك الباطو وغتبقى تشوف فيه حتى غيغبر فهاد الحالة الباطو مابعدش وانما هبط على شكل منحنى...

شي وحدين مأيدين هاد الفكرة ديال الأرض المسطحة بهاد الآية ( وَمِنْ حَيْثُ خَرَجْتَ فَوَلِّ وَجْهَكَ شَطْرَ الْمَسْجِدِ الْحَرَامِ وَإِنَّهُ لَلْحَقُّ مِن رَّبِّكَ وَمَا اللَّهُ بِغَافِلٍ عَمَّا تَعْمَلُونَ ) [ البقرة : 149 ] هاد الآية كتهضر على القبلة يعني فاش تكون باغي تصلي خصك تشوف جيهة المسحد الحرام، ايلا كنتي مثلا فالمغرب القبلة راها باينة اما ايلا كنتي فميريكان كي غادير تشوف لجيهة المسجد الحرام ؟ يمكن ليك تشوف القبلة فحالة كانت الارض مسطحة اما ايلا كانت الارض كروية ميمكنش لك تشوف القبلة حيت ايلا بغيتي تشوف جيهة المسجد الحرام غتلقى راسك كاتشوف فالسماا...
وكاينة واحد الآية خرى كتبين بلي الشمس لي كادور على الارض..(والشمس تجري لمستقر لها ذلك تقدير العزيز العليم...وترى الشمس اذا طلعت تزاورو عن كهفهم ذات اليمين واذا غربت تقرضهم ذات الشمال) يعني ان الشمس جارية (كادور) ماشي تابثة كيف كنعرفو حنا...هادي وجهة نظر

نشوفو دابا بعض الآيات لي كيهضرو على هاد القضية، نبداو بهاد الآيات (والأرض بعد دحاها)..(والأرض مددناها)...(نأتي الأرض ننقصها من اطرافها)...هاد الآيات كيقولو بعض الناس بلي كاتأكد على سطحية الأرض وبلي متناقضة مع النظرية لي كتقول الارض كروية ولكن على حسب معريفتي ديك الكلمة ديال "دحاها" كتعني "كورها" حيت الأصل ديال الكلمة "دحية" كتعني بيضة ولكن الكالاخ ديال بعض المفسرين هو لي خلا بنادم يفهم بالمقلوب..

نشوفو شي آيات خرين، قال تعالى: "يكور الليل على النهار ويكور النهار على الليل" العلماء كيقولو بلي الارض كتبان لينا مسطحة حيت ميمكنش لينا نشوفو الكروية ديالها فالمسافات القريبة..وكيقولو هاد العلماء بلي الارض كروية الكل ومسطحة الجزء. المصدر👈 فتاوى اللجنة الدائمة.

نشوفو هاد الآية لي النص فاهمها غالاط ("وإلى الأرض كيف سطحت") هاد الآية مكتعنيش بلي الأرض مسطحة لا، العلماء كيقولو بلي هاد الآية كتقول بلي الارض كروية مسطحة يعني كروية فالشكل الخارجي ديالها ومسطحة فالعمق ديالها حيت مستديرة ولكن حيت الارض كبيرة منقدروش نشوفو الإستدارة ديالها، المصدر 👈 فتاوى ورسائل العثيمين (8/644).....هاد التناقض لي كنشوفوه فبعض التفاسير ديال الآيات راجع للفهم الغلط والتفسير الغلط ديال بعض الناس لي كيسميو ريوسهم علماء دين لاسيما ان "العرب اتفقو على ألا يتفقو" وكل واحد كيفسر ويفهم كيف بغى وغير لي ربى جوج زغبات يدير فيها عالم دين ويبدى يفسر ويشرق ويغرب حيت عارفين بلي اي حاجة قالوها بإسم الدين كنتيقوها حيت حنا شعب كنكذبو العلم وكنتيقو لحاية واهم شيء كنركزو على الجاهز ومكنبحثوش...موهيم انا باش نكون محايد شرحت النظرية وعطيت موقف الملاحدة وعطيت موقف علماء الدين وفالأخير الأرض ما مسطحة ما كروية الله أعلم....نتشاوفو فشي موضوع خر.

بقلــم: الســـــــﺎﻋــــﺮ